2. KABAALAN MAMBASA

KABAALAN MAMBASA

Modul 3

Basao dikoyu kotob teks id siriba om simbaro pongudiaan miampai sisimbar di kosudong.

            “Osonong kosuabon, ngaran ku nopo nga i Mike Roland mantad Hilo’ Tambunan. Alansan oku do kaanu tokou mogiintutun om mogiambalut kumaa tiso om tiso.” Soira norongou ku tongung do rolou, ungag oku no minintong hilo id dumbangan.

            “Gannon!!!” Ologod tomod o giak ku. Nokotigog tomod oku do nokokito di palajal wagu. Songingintong po kaanto i tongotambalut doho nga amu ko no pinusou. “Vio, Kotutun ko di Mike”? ka ngawi diolo do minongudio doho. “Ho kotutun oku disio,” kangku do suminimbar.  “Nokuro tu’ I Gannon pomolohou nu dau?” ka kawagu diolo.

“Oo…Gannon nopo nga ngaran ku toomod. Iri no Ngaran pomolohou kasari do tulun doho.” Amu ku po nosimbar pongudiaan di tongotambalut nga notolinahas no Gannon.

            Maso dii nopo nga Kinorohingan om tinan ku sondii no karati do suang ginawo ku. Ounsikou tomod o ginawo ku noonuan do Kinorohingan do kosiwatan do ruminuba kawagu di Gannon. Au nopurimanan do nokoluyung romou do mato ku. Sikapai ku no do suminoliwan mantad hiri id kalas om ongoi oku no hilo id bombong do sikul.

            “Naa… pihido no romou mato no.” Haro iso longon pinotunui do sapu tangan.

(naanu om sinimban mantad suniba ‘Gannon’ suatan I

Clayvionna Thomas id buuk Tumangkabo, 2015)

Abaabayan :

1.         Tanda (√) i sisimbar di otopot om (X)  sisimbar di au otopot.

1.	Ngaran nopo di Gannon I tootopot nga Mike Roland.	(           )
2.	Kotutun i palajal kumaa di Gannon.	(            )
3.	Nokotigog i Vio nokokito di Gannon	(            )
4.	Ounsikou I vio nokopiruba di Ganno	(           )
5.	Suminoliwan I Vio mantad id kalas om tilombus no minuli id walai.	(            )

2.         Potolinahaso isai i Mike Roland di otopot.

3.         Tumanud do kotob teks, potolinahaso  rati do “norongou ku tongung do rolou.”

4.         Id Pomusarahan nu sondii, nunu mesej i pinolombus do kotob teks dii.

MODUL 4

Basao om rotion sisindiron id Soriba.

Kalansanan di Odu Aki

Osorou ku timpu nakatalib

Pinointutun oku nogi do sikul

Tadau koiso nosontob noronok

“Jamius… kada korosi, ogumu tambalut”

 Osontol yodu monginsasamod

Pinalansan oku di odu yaki

Atangkangau monikid timpu

Mogihum kosuusukupan

Popoimogot koposion paganakan

Wulan kumoiso minsingubas sumikul

Misowoli Yodu om Yaki mangangkawot doho

Au olutasan do susuyan

Kohiok monginiba tindalanon

Di hopod no toun umul ku

Natagakan om nogonitan ginawo ku

Yaki koupusan natalup id winoun

Nobusou bato noindamaan monigup

“Ilagon monigup” pason di dokutul

Yodu osongulunan miampai binuru-buru dau

Turos nokungkum karatas

Tinimbuku nokopurak mogingkokoro

Sumout pongingintong

Kakal ogoris monongsukud kowiton

Ika koupusan ku gisom opupus timpu

(Naanu mantad Buuk teks BKD pangan koiso, 2006)

Abaabayan :
Miampai sisindiron id sawat,  simbaro poguhatan id siriba diti miampai sisimbar di kosudong.

1. Maya pomusarahan nu sondii, tonduai rati  do “Jamius… kada korosi, ogumu tambalut”?
2.  Panahak komoyon do “Ilagon monigup”? 
3. Mantad korotian dikoyu, potolinahaso rati do rontop kolimo sisindiron diri.
4. Patayado duo ponontudukan di aanu mantad sisindiron diti.
5. Id pomusarahan nu sondii, sabaagi songulun tanak, potolinahas tonggungon tokou kumaa molohing tokou.